बेळगाव-बेळगुंदी रस्त्यावर दुचाकीस्वार महाविद्यालयीन विद्यार्थी ठार

बेळगाव—belgavkar Belgaum-Belgundi Road Accident : मालवाहू टेम्पोच्या धडकेत दुचाकीस्वार महाविद्यालयीन विद्यार्थी ठार झाला. बेळगाव-बेळगुंदी रस्त्यावर बेनकनहळ्ळीजवळ सोमवारी सकाळी साडेदहाच्या सुमारास हा अपघात घडला. दयानंद यंकाप्पा लमानी ऊर्फ चव्हाण (वय 21, रा. दाडीभावी तांडा, ता. रामदुर्ग) असे मृताचे नाव आहे.

याबाबत वडील यंकाप्पा लमानी यांनी फिर्याद दिली असून, अनोळखी चालकाविरोधात गुन्हा दाखल करण्यात आला आहे. दयानंद हा बेळगाव येथे बीएस्सीचे शिक्षण घेत होता. त्यांचे पाहुणे बेळगुंदी येथे आहेत. रविवारी पाहुण्याकडे तो राहण्यासाठी गेला होता. तेथून सोमवारी सकाळी बेळगावला महाविद्यालयाला निघाला. ओव्हरटेक करून तो पुढे जाण्याचा प्रयत्न करत होता. बेनकनहळ्ळी येथील एका मोठ्या मालगोदामजवळ समोरून टेम्पो येत होता.

तत्परता दाखवत दयानंदने टेम्पोचा समोरील भाग चुकवला; परंतु टेम्पोचा काही इंच पाठीमागचा भाग त्याच्या डोक्याला आदळल्याने तो रस्त्यात कोसळला. त्याला तातडीने 108 रुग्णवाहिकेद्वारे जिल्हा रुग्णालयात हलविले; परंतु डॉक्टरांनी मृत घोषित केले. घटनेची माहिती मिळताच ग्रामीण पोलिसांनी घटनास्थळी भेट देऊन पंचनामा केला.

Belgaum-Belgundi Road Accident Belgaum belgav belagavi belgavkar