बेळगाव : उद्यमबाग येथील टाईल्सचे दुकान फोडले

बेळगाव—belgavkar : उद्यमबाग येथील बांधकाम साहित्य विक्रीचे दुकान फोडून ₹ 90 हजार 620 रुपयांची रोकड अज्ञातांनी चोरल्याचे सोमवारी उघडकीस आले. 27 ते 29 जानेवारी या दरम्यान ही चोरीची घटना घडली आहे. यामुळे अज्ञात चोरट्यांच्या विरोधात उद्यमबाग पोलिस ठाण्यात गुन्हा दाखल नोंदविण्यात आला आहे.

याबाबत अधिक माहिती अशी की, नानावाडी, बेलाविस्टा येथील रहिवासी विष्णू श्रीकांतसा रायबागी (वय 55) यांचे खानापूर रोड, उद्यमबाग येथील बेम्को क्रॉस येथे प्रकाश सिरॅमिक टाईल्सचे दुकान आहे. दररोज सकाळी 10 वाजता दुकान उघडून रात्री 8.30 सुमारास ते दुकान बंद करतात. या ठिकाणी 11 कामगार असून एक वॉचमनही आहे. 27 जानेवारी रोजी नेहमीप्रमाणे दुकान उघडण्यात आले व यादिवशी 90 हजार 620 रुपयांच्या साहित्याची विक्री झाली. सदर रक्कम रात्री साडेआठच्या सुमारास कॅश काऊंटरमध्ये ठेवून दुकान बंद करून ते तेथून घरी आले.

परंतु, 29 जानेवारी सकाळी सव्वादहाच्या सुमारास टाईल्स दुकानातील कामगार चिन्मय हिरेमठ यांनी फोन करून दुकानाचा दरवाजा उघडा असल्याचे तसेच कॅश ड्रॉव्हरही उघडण्यात आल्याची माहिती दिली. यामुळे दुकान मालक विष्णू रायबागी यांनी तातडीने दुकानाकडे धाव घेतली. दुकानाची पाहणी केल्यानंतर बाथरुमची खिडकी तोडून अज्ञातांनी दुकानात प्रवेश केल्याचे आढळून आले. शिवाय ड्रॉव्हरमधून 90 हजार 620 रुपयांची रोकड चोरण्यात आली. त्यामुळे दुकान फोडून रोख रक्कम चोरीस गेल्याबाबत फिर्याद दाखल करण्यात आली.

दरम्यान, उद्यमबाग पोलिसांना चोरीची माहिती मिळाल्यानंतर त्यांनी घटनास्थळी धाव घेतली. यावेळी पंचनामा करून अज्ञात चोरट्यांच्या विरोधात गुन्हा दाखल केला. घटनास्थळी श्वानपथक आणि ठसे तज्ज्ञांनाही पाचारण करण्यात आले होते.

Belgaum Udyambag Tiles Shop Robbery belgav belagavi belgavkar explore digital india
belgavkar news | digital india
explore digital india | belgaum news

Belgaum Udyambag Tiles Shop Robbery