बेळगाव : उद्यमबाग येथे ड्रिल ब्रेकरने बँकेवर दरोड्याचा प्रयत्न

बेळगाव—belgavkar : ड्रिल ब्रेकरच्या साहाय्याने शनिवारी मध्यरात्री उद्यमबाग औद्योगिक वसाहतीतील बँक ऑफ बडोदाची भिंत फोडण्याचा प्रयत्न झाला आहे. बँकेच्या पाठीमागील बाजूची भिंत फोडण्याचा प्रयत्न केल्याने परिसरात एकच खळबळ माजली आहे. रविवारी सकाळी हा प्रकार उघडकीस आल्यानंतर उद्यमबाग परिसरातील कारखानदारांत भीतीचे वातावरण पसरले आहे. घटनेची माहिती समजताच गुन्हे तपास व वाहतूक विभागाच्या पोलीस उपायुक्त पी. व्ही. स्नेहा, उद्यमबागचे पोलीस निरीक्षक डी. के. पाटील व त्यांच्या सहकाऱ्यांनी घटनास्थळी भेट देऊन पंचनामा केला.

पाठीमागील भिंत फोडण्याचा प्रयत्न अयशस्वी झाल्याने मोठा अनर्थ टळला आहे. बेळगाव-खानापूर रोडपासून केवळ हाकेच्या अंतरावर बँक ऑफ बडोदाची शाखा आहे. त्याच्या बाजूला मराठा बँक आहे. या बँक इमारतीच्या मागे मंगला इंजिनिअरिंग, वर्पे इंजिनिअरिंग, परफेक्ट इलेक्ट्रिकल्स आदी कारखाने आहेत. नेहमीप्रमाणे रविवारी सकाळी काही कारखानदार आपल्या कारखान्यात आले असता हा चोरीचा प्रकार उघडकीस आला. चोरट्यांनी ड्रिल ब्रेकरला वीजजोडणी घेण्यासाठी मंगला इंजिनिअरिंग व वर्पे इंजिनिअरिंग फोडण्याचा प्रयत्न केला आहे. शेवटी सुमारे 50 फूट अंतरावरील परफेक्ट इलेक्ट्रिकल्सचा दरवाजा फोडून तेथून वीज घेतल्याचे उघडकीस आले आहे. बँक इमारतीच्या पाठीमागील बाजूची भिंत ड्रिल ब्रेकरने फोडण्याचा प्रयत्न झाला आहे. याच ठिकाणी स्ट्राँगरुम असल्यामुळे गुन्हेगारांना भिंत लवकर फोडता आली नाही.

ड्रिल मारून भगदाड पाडूनही भिंत तोडता आली नाही म्हणून गुन्हेगारांनी तेथून काढता पाय घेतला आहे. जर भिंत फोडून बँकेच्या इमारतीत प्रवेश करण्यात गुन्हेगार यशस्वी ठरले असते तर मोठी लूट झाली असती. ड्रिल ब्रेकरने इमारत फोडण्याचा प्रयत्न करताना मोठा आवाज येतो. तरीही हा प्रकार कोणाच्या लक्षात आला नाही. रात्रीच्या गस्तीवरील पोलिसांच्याही निदर्शनास हा प्रकार आला नाही.

Belgaum Udyambag Bank Robbery Attempt belgav belagavi belgavkar
belgavkar news
belgaum news

Belgaum Udyambag Bank Robbery Attempt belgav

Belgaum Udyambag Bank Robbery Attempt belgav