बेळगाव : युवकाचा खून कोणी व कशासाठी केला?

बेळगाव—belgavkar—belgaum होन्निहाळ (ता. बेळगाव) जवळ खून झालेल्या युवकाचा खून कोणी व कशासाठी केला? याचा तपास करण्यात येत आहे. यासाठी मारिहाळ पोलिसांनी तपास हाती घेतला आहे. खून झालेल्या युवकाच्या मोबाईलवर किती जणांनी संभाषण केले? याची माहिती मिळविण्यात येत आहे.

निंगनगौडा शिवनगौडा सनगौडर (वय २७) मूळचा रा. आलदकट्टी, ता. सौंदत्ती सध्या रा. श्रीनगर-बेळगाव असे त्याचे नाव आहे. सोमवार दि. १८ नोव्हेंबर रोजी सकाळी सांबरा विमानतळाच्या भिंतीला लागूनच असलेल्या होन्निहाळ येथील शेतवडीत खून झालेल्या अवस्थेत त्याचा मृतदेह आढळून आला आहे.

belgaum murder honnihal airport road

belgaum murder honnihal airport road

मारिहाळ पोलिसांनी या परिसरातील सीसीटीव्ही फुटेज पडताळण्याचे काम हाती घेतले आहे. रविवार दि. १७ नोव्हेंबर रोजी रात्री यरगट्टीहून निंगनगौडा बसमधून बेळगावकडे येत होता. मात्र, काही कारणास्तव त्याला मोदगाजवळ बसमधून उतरविण्यात आल्याची माहिती मिळाली आहे. सीसीटीव्ही फुटेजवरून याचा उलगडा झाला आहे.

मोदगाहून होन्निहाळ येथील शेतवडीपर्यंत तो कसा पोहोचला? त्याला तिथपर्यंत कोणी नेले? विटांनी डोक्यावर हल्ला करून त्याचा कोणी खून केला? याचा उलगडा झाला नाही. मोबाईल संभाषणावरून मारेकऱ्यांपर्यंत पोहोचण्याचे प्रयत्न सुरू आहेत. रविवारी रात्री शेवटी निंगनगौडाने आपल्या आईशी संभाषण केल्याचे उघडकीस आले आहे.

या प्रकरणाचे गूढ अधिक वाढत चालले आहे. बेळगावला पोहोचण्याआधीच या युवकाला मोदग्याजवळ बसमधून का उतरविण्यात आले? याचीही चौकशी करण्यात येत आहे. पोलीस आयुक्त यडा मार्टिन मार्बन्यांग यांच्या मार्गदर्शनाखाली मारिहाळ पोलीस पुढील तपास करीत आहेत.