बेळगाव : गोवावेस येथील पेट्रोल पंपाच्या जागेसाठी विक्रमी बोली

बेळगाव—belgavkar : गोवावेस येथील पेट्रोल पंपाच्या जागेसाठी विक्रमी बोली लागली आहे. लिलावात सहभागी झालेल्या चौघांपैकी एकाने तब्बल 5 लाख 41 हजार रुपयांची बोली लावून जागा भाडेकराराने घेतली आहे. शनिवारी या जागेसाठी ऑनलाईन लिलाव प्रक्रिया झाली. सायंकाळी साडेपाच वाजेपर्यंत ही लिलाव प्रक्रिया सुरू होती. गोवावेस येथील पेट्रोल पंपाच्याजागेच्या लिलावात 2 लाख 27 हजार रुपये मूळ बोली होती.

लिलावात सहभागी झालेल्यांना त्यापुढे बोली लावणे आवश्यक होते, परंतु या मूळ बोलीच्या दुपटीहून अधिक बोली प्रत्यक्षात लिलावात लागली आहे. ही सर्वोच्च बोली कोणी लावली हे महापालिकेकडून गुलदस्त्यात ठेवण्यात आले आहे. लिलावाची प्रक्रिया पूर्ण झाल्यावर त्याबाबतची माहिती जाहीर केली जाणार आहे. परंतु, ज्या व्यक्तीने ही बोली लावली आहे, त्याने संपूर्ण अनामत रक्कम भरून जागेचा कब्जा घेतला व तेथे पेट्रोल पंप सुरू केला तर महापालिकेला दरमहा 5 लाख 41 हजार रुपये भाडे मिळणार हे नक्की झाले आहे.

गोवावेस येथील दत्त मंदिर बाजूला असलेल्या पेट्रोल पंपाची जागा महापालिकेच्या मालकीची आहे. ती जागा भाडेकराराने देण्यासाठी शनिवारी ऑनलाईन लिलाव प्रक्रिया आयोजित केली होती. सकाळी 11 ते सायंकाळी 4 या वेळेत ही लिलाव प्रक्रिया होणार होती. या जागेचा लिलाव होऊ नये यासाठी जुन्या भाडेकरूने न्यायालयात धाव घेतली होती. लिलाव प्रक्रियेला स्थगिती देण्याची मागणी केली होती. त्यामुळे लिलावाला प्रतिसाद मिळण्याबाबत साशंकता होती. परंतु, स्थगिती देण्यास उच्च न्यायालयाच्या धारवाड खंडपीठाने नकार दिला. त्यामुळे शनिवारी ऑनलाईन लिलाव प्रक्रिया झाली.

Belgaum Goaves Petrol Pump Tender belgav belagavi belgavkar
belgavkar news
belgaum news

Belgaum Goaves Petrol Pump Tender belgav